Того же лѣта князь Всеславь Полотцкии Брячиславичь взявъ Новьгородъ и пожже; а потомъ на 3-е лѣто побѣдиша Новогородци Всеслава. Бысть же сице: заратися Всеславь и взя Новгородъ, и пожже до Неровского конца; и поима все вь святѣи Софии, и паникадила и колоколы, отъиде. Ярославичи же трие, князь великии Изяславъ, и Святославъ, и Всеволодъ, съвокупиша вои, идоша на Всеслава Полотцкаго, зимѣ сущи велицѣ; и приидоша къ Менску, и Мениане затворишася въ градѣ; князи же взяша градъ Менескь и иссѣкоша мужи, а жены и дѣти даша на щитъ. И поидоша къ Немизи, и ту выиде противу ихь Всеславь, и сьвъкупишася обои на Немизѣ, марта 3 день, бѣ бо снѣгь великь, и поидоша противу себѣ; и бысть имъ бои великъ и сѣча зла, многы падоша, и одолѣша Ярославичѣ, а Всеславь побѣже. Посемь же, мѣсяца иуля въ 10 день, трие Ярославичи, князь великии Изяславъ, и Святославь и Всеволодъ, цѣловаша кресть кь Всеславу, и послаша къ нему, глаголюще: «Прииди къ намъ, яко не сътворимъ ти зла». Онъ же надѣяся на крестное цѣлование, иде къ нимъ на Ршу, поиха въ лодьи черезъ Днѣпрь. Изяславу же въ шатерь предъидущу, а Всеславу по немъ идущу, и яша Всеслава на Рши у Смоленска, преступивше кресть. Изяславъ же приведъ Всеслава кь Киеву, всади его въ порубь и съ двѣма сынома. Преступление крестное.

В лѣто 6575 [1067]. Заратися Всеславъ, сынъ Брячиславль, полотескыи и зая Новъгородъ до Неревьскаго конца, и пожже и поима все у Святѣи Софии, и паникадила, и колоколы, и отъиде. И Ярославичи же трие, Изяславъ, Святославъ, Всеволодъ, совокупиша вои и идоша на Всеслава, зимѣ суще велици, и приидоша къ Меньску, и меняне затворишася въ градѣ. Сии же князи взяша градъ Менескь и иссѣкоша мужи, а жены и дѣти даша на щитъ: и поидоша к Немизи, и Всеславъ поиде противу, и совокупишася обои на Немизѣ марта 3 день, бѣ бо снеѣгъ великъ, и противу поидоша себе, и бысть сѣча зла, многы падоша. И одолѣ Изяславъ и Святославъ, и Всеволодъ, а Всеславъ побѣже. По семъ же месяца июля въ 10 день Изяславъ и Святославъ, и Всеволодъ целовавше крестъ къ Всѣславу, ркуще ему: «Прииди к намъ, яко не створим ти зла». Он же, надѣявся о целовании креста, поѣде в лодии чрезъ Днѣпръ. Изяславу же въ шатеръ предъ идущу, а Всеславу же по немъ идущу, и яша Всеслава на Рши у Смоленьска, преступивше крестъ. Изяславъ же, приведъ Всеслава къ Киеву, всади в порубъ съ двѣма сынома.